Назарбаев Университетінің профессоры Грузиядағы археологиялық ашылымдарға үлес қосты
Суретте: Рас Гиорги Копалани, Николаз Ванишвили және өзінің қазба алаңында бұл жәдігерді тапқан далалық мектеп студенті Жюльетт Сунига.
Назарбаев Университетінің Социология және антропология кафедрасы өз профессоры мен магистрантының Грузияда жүзеге асырылған халықаралық археологиялық жобаға қатысқанын қуана хабарлайды.
Осы жазда кафедра меңгерушісі профессор Рид Коил және «Еуразиялық зерттеулер» (MA in Eurasian Studies) білім беру бағдарламасының магистранты Гүлнұр Мұратова Дманисидің маңында орналасқан, ежелгі қазба байлықтарымен танымал Орозмани ауылындағы қазба жұмыстарына қатысты.
Қазба барысында археологтар шамамен 1,8 миллион жыл бұрын өмір сүрген ежелгі Homo erectus өкіліне тиесілі төменгі жақ сүйегін тапты. Бұл жаңалық Орозмани орнын Евразиядағы ең ерте адамдардың ізін зерттеудегі негізгі орталықтардың біріне айналдырады.
Бұл өңір бұған дейін де халықаралық ғалымдардың назарын аударған еді. 2022 жылы мұнда сол дәуірге тиесілі тіс фрагменті табылған болатын. Бұл екі жаңалық Кавказдың Африкадан шыққан алғашқы адамдардың көшу жолындағы маңызды дәліз болғанын дәлелдей түседі.
«Бұл ашылым осы өңірдегі адамзаттың терең тарихын танудағы маңызды қадам болды, – деді профессор Коил. – Сонымен қатар ол халықаралық ғылыми ынтымақтастықтың құндылығын көрсетеді. Қазақстан ғалымдарының үлесі біздің ортақ өткеніміз туралы жаңа деректерді ашуға көмектесуде».
Гүлнұр Мұратова өз әсерімен бөлісті: «Бұл қазба жұмыстарына қатысу мен үшін университетте алған білімімді іс жүзінде қолдануға үлкен мүмкіндік болды. Әлемдік маңызы бар жаңалықтарға халықаралық әріптестермен бірге атсалысу ерекше шабыт сыйлады».
БАҚ-та Назарбаев Университетінің өкілдері ұлттық БАҚ-та жарияланды: